Жол қызметтері Қазақстан бойынша еріген қар суы ағатын кезеңде республикалық маңызы бар автожолдарда үздіксіз және қауіпсіз жүруді қамтамасыз ету үшін қажетті шаралар қабылдауда. Бұл туралы ҚР Индустрия және инфрақұрылымдық даму министрлігінің ресми интернет-ресурсы хабарлады.
Тұрақты бақылаудың нәтижесінде республикалық маңызы бар автомобиль жолдарының қауіпті учаскелері анықталды. Республикалық маңызы бар автожолдардың барлық желісінде ұзақтығы 361 шақырым болатын 436 су тасқыны қаупі бар орындар айқындалды. Көктемнің барлық кезеңінде ол учаскелер тәулік бойы бақыланады.
Қауіпті болдырмау мақсатында мердігер ұйымдар 23 мың куб метр инертті материалдар, 2 мың куб метр тас, 183 тонна жанар-жағармай материалдарын әзірледі. Су тасқынының ықтимал салдарын жоюға 689 техника дайын тұр.
Аталмыш жұмыстарға облыстардағы қоғамдық филиалдар, «Қазақавтожол» ЖШС бөлімшелері, қайта жаңғырту және күрделі жөндеу жұмыстарын жүргізетін мердігер ұйымдар жұмылдырылған. Қазіргі уақытта республикалық автожолдарда еріген қар суының бөгетсіз ағып кетуі үшін су өткізу құбырларын ашу жұмыстары жүргізілуде. 2 996 құбыр аршылды, ол жоспардағының 40,5%-ы (7 373 дана).
Су тасқынына байланысты төтенше жағдайлар қаупі туындаса, «ҚазАвтоЖол» ҰК» АҚ мен «ҚазақАвтоЖол» ЖШС жол жүрушілерді қауіпті жағдайлардың туындағаны жайында және оларды жою мерзімдері туралы ресми сайттарында дереу хабарлайтын болады.
Республикалық автожолдарда төтенше жағдай орын алған жағдайда жол жүрушілер +7 7172 444 777 қалалық телефон нөмірі арқылы немесе WhatsApp желісіне қосылған +7 771 7444 777 диспетчерлік ұялы телефонына хабарласа алады.
