Беларусь Республикасының Брест қаласында «Брест – ТМД елдерінің 2019 жылғы мəдени астанасы» іс-шарасының жабылу салтанаты өтті. Салтанатты іс-шарада Брест қаласы 2020 жылғы ТМД-ның мәдени астанасы эстафетасын Шымкентке ресми түрде табыстады. Бұл туралы Шымкент қаласы әкімдігінің ресми сайты хабарлады.
Достық пен өзара ынтымақтастықты өрістеткен жиынға 2020 жылғы ТМД-ның мәдени астанасы мәртебесін иеленген Шымкент қаласынан арнайы өкілдер қатысты. Шымшаһардың мерейін асырған мәртебелі іс-шараға үшінші мегаполистің делегациясын Шымкент қаласы әкімінің бірінші орынбасары Қайрат Нұртай бастап барды. Мерекелік іс-шара шеңберінде Шымкент қаласы ішкі саясат және дін істері басқармасының басшысы Жанар Бектаева, сондай-ақ фототілшілер қаламыздың туристік және тарихи-мәдени әлеуетін таныстырды.
Жиын аясында ТМД Мемлекетаралық гуманитарлық ынтымақтастық қорының (МГЫҚ) отырысы өтіп, онда Брест қаласында Достастықтың мәдени астанасы ретінде атқарылған жұмыстары сараланып, оның қорытындысы талқыланды. БАҚ өкілдері үшін арнайы баспасөз жиындары ұйымдастырылып, қонақтар «Брест қорғаны» мемориалдық кешеніне барып, Мәңгілік алауға гүл шоқтарын қойды.
Бұдан соң Брест академиялық драма театрында «Брест – ТМД елдерінің 2019 жылғы мəдени астанасының» қорытынды жабылу салтанаты өтті. Мерекелік концертке ТМД елдерінің үздік өнерпаздары қатысты.
