Түркістан облысы қоғамдық даму басқармасына қарасты «Жастар ресурстық орталығы» коммуналдық мемлекеттік мекемесінің ұйытқы болуымен Кентау шаһарында қоғамның өзекті мәселесінің бірі — NEET санатындағы, яғни екі қолға бір күрек таба алмай, оқудан да, жұмыстан да тыс қалған селсоқ жастардың үлесін азайту бағытында кешенді іс-шаралар кезегі атқарылды. Осы мақсатта арнайы мамандардан құралған топ қала көшелері мен аулаларды аралап, тұрғындармен етене жүздесті, ақпараттық-түсіндіру жұмыстарын кең құлашты да қарымды ұйымдастырды.
Аула аралау үрдісі барысында жергілікті тұрғындарға, соның ішінде жас буын өкілдеріне мемлекет тарапынан көрсетілетін әлеуметтік қолдау шараларының қыр-сыры тәптіштеп айтылды. Мәселен, нәтижелі жұмыспен қамту бағытындағы бағдарламалардың тиімділігі, заман талабына сай жаңа мамандықтар бойынша кәсіптік білім алудың кең мүмкіндіктері жан-жақты сараланып, халық назарына ұсынылды. Мұндай ашық дидарласу — ақпарат тасқынынан тыс қалып, өз бетінше әрекет ете алмай жүрген қыз-жігіттердің көкірек көзін ашып, бағыт-бағдар сілтеуге септігін тигізері хақ.
Бұл үрдіс тек сырттай насихатпен шектелген жоқ. Орталық мамандары Кентау қалалық Мансап орталығының қызметкерлерімен арнайы кездесіп, бүгінгі таңда жұмыспен қамту саласында атқарылып жатқан ауқымды істердің барысымен, тыныс-тіршілігімен тікелей танысты. Дөңгелек үстел басындағы келелі кеңесте бүгінгі еңбек нарығындағы өзекті түйткілдер, мекемелердегі бос жұмыс орындарының жай-күйі, жастарды тұрақты кәсіпке орналастырудың құқықтық әрі тәжірибелік тетіктері ортаға салынды. Сонымен қатар, уақыт талабына сай кәсіптік қайта оқыту курстарының маңызы мен мемлекеттік бағдарламаларды жергілікті жерде іске асырудың аралық нәтижелері қызу талқыға түсті.
Тәжірибе алмасу мен өзара пайымдасудан соң, екі тарап алдағы уақытта да қоян-қолтық жұмыс істеуге уағдаласты. Алдағы кезеңде NEET санатына жататын жастарды нақты анықтау, олардың есеп-қисабын түгендеп, қоғамдық-пайдалы еңбекке тарту, сондай-ақ бұқара арасындағы ақпараттық-түсіндіру шараларын бірлесе, жүйелі түрде жүргізу бағытында ортақ байламға келіп, өзара пікір алмасты.
Осы тектес кешенді әрі жүйелі жұмыстар халықтың мемлекет тарапынан берілетін демеушілік құралдар мен тетіктер туралы хабардарлық деңгейін арттыруға, жұмыспен қамту органдарының өзара іс-қимыл желісін ширатуға және аймақтағы жастар саясатының тиімділігін арттырып, оны нәтижелі жүзеге асыруға зор ықпал етпек.