Отандық кәсіпкерліктің көкжиегін кеңейтіп, өз ісін дөңгелеткісі келетін іскер азаматтар үшін мүмкіндіктер есігі айқара ашылмақ. 2026 жылдың 24 маусымы мен 8 шілдесі аралығында Business.enbek.kz арнайы электронды порталы арқылы жаңа бизнес-идеяларды жүзеге асыруға ниетті үміткерлерден қайтарымсыз мемлекеттік грант алуға ресми түрде өтінімдер қабылданады. Осынау игілікті жобаның басты мақсаты — жаңадан кәсіп ашуға бел буған немесе қолданыстағы жеке бизнесін өркендетіп, аяғынан тік тұрғызуға талпынған азаматтардың бастамасына демеу болып, олардың әлеуметтік-экономикалық әлеуетін арттыру.
Мемлекет тарапынан берілетін қаржылай қолдаудың ауқымы да қомақты. Әрбір мақұлданған жобаға тағайындалатын грант мөлшері 400 айлық есептік көрсеткішті, яғни нақты ақшалай баламада 1 730 000 (бір миллион жеті жүз отыз мың) теңгені құрайды. Бұл қаражат — нарықта өз орнын тапқысы келетін кәсіп иелері үшін алғашқы қадамды сенімді басуға септігін тигізетін маңызды құрал.
2026 жылдың еншісіне бұйырған мемлекеттік бағдарлама аясында Түркістан облысына жаңа кәсіпкерлік идеяларды іске асыру үшін жалпы саны 1450 грант бөлініп отыр. Кәсіпке бет бұрған аймақ жұртшылығының белсенділігін арттыру және өңірлік теңгерімді сақтау мақсатында аталған гранттар облысқа қарасты аудандар мен қалалар арасында төмендегідей тәртіппен нақты үлестірілген:
- Сайрам ауданы — 154 грант;
- Түркістан қаласы — 151 грант;
- Сарыағаш ауданы — 140 грант;
- Жетісай ауданы — 131 грант;
- Қазығұрт ауданы — 100 грант;
- Ордабасы ауданы — 88 грант;
- Мақтаарал ауданы мен Төлеби ауданы — әрқайсысына 85 гранттан;
- Келес ауданы — 80 грант;
- Түлкібас ауданы — 74 грант;
- Сауран ауданы — 71 грант;
- Кентау қаласы — 62 грант;
- Шардара ауданы — 58 грант;
- Арыс қаласы — 53 грант;
- Созақ ауданы — 46 грант;
- Отырар ауданы — 39 грант;
- Бәйдібек ауданы — 33 грант.
Тәуекел етіп, өз несібесін адал еңбектен іздеген азаматтарды қолдауға бағытталған бұл шара — елдегі жұмыссыздық деңгейін төмендетіп, шағын және орта бизнестің тамырына қан жүгіртудің тиімді тетігі. Барша талапкерлер өздерінің бизнес-жобалары мен өтінімдерін белгіленген қатаң мерзімнен кешіктірмей, жоғарыда көрсетілген Business.enbek.kz порталы арқылы электронды түрде жолдай алады.