Адам өміріндегі ең қимас, ең пәк және ұмытылмас шақ — мектеп қабырғасында өткен жылдар болса керек. Ал сол білім ордасының тарихында алғашқы соққан қоңырау мен тұңғыш түлеп ұшқан шәкірттердің орны әрқашан бөлек, шоқтығы биік. Жақында Төлеби ауданы білім бөліміне қарасты №10 жалпы білім беретін мектебінде дәл осындай тебіреніске толы, тарихи да абзал сәт өтті. Білім ұясы өз тарихында алғаш рет алтын қанат балапандарын қияға баптап, үлкен өмірдің даңғыл жолына шығарып салды.
2025–2026 оқу жылының қорытындысы бойынша бұл қара шаңырақ үшін мақтаныш пен қуаныш қатар өрілген берекелі жыл болды. Биылғы маусымда 11-сыныпты 40 оқушы ойдағыдай тәмамдап, қолдарына үлкен өмірдің жолдамасы іспетті орта білім туралы аттестаттарын алды. Осынау көпшілік ішінен суырылып шыққан 2 түлек Үздік аттестатқа ие болып, мектептің мақтанышына айналды.
Сонымен қатар, қанаттары қатайып, үлкен межеге қадам басқан 9-сыныптың 53 оқушысына негізгі орта білім туралы куәліктері табысталды. Олардың ішінде 4 оқушы Үздік куәлікпен марапатталып, білім бәйгесінде оқ бойы озық тұрғандарын дәлелдеді.
Бұл жетістік — тек бір ғана күннің немесе бір ғана адамның еңбегі емес. Бұл — тайға таңба басқандай анық, мектеп ұжымының кәсіби біліктілігінің, ата-аналардың перзент болашағына деген қамқорлығының және оқушылардың көз майын тауысқан ізденімпаздық бейнетінің ортақ жемісі. Алғашқы түлектердің салған бұл сара жолы мен қол жеткізген табыстары — білім ордасының алдағы ғасырларға созылар келешек жетістіктерінің нұрлы бастауы, берік іргетасы боларына сеніміміз кәміл.
Ақ жол, жас қырандар! Болашаққа сеніммен, паңдықпен қадам басыңыздар! Жеңісті күндеріңіз бен асуларыңыз көп болсын!