Қазақстанда өрт сөндірушілер, құтқарушылар мен дәрігерлерді біріктіретін әмбебап құтқару кешендері кезең-кезеңімен құрылып жатыр. Бұл бөлімшелер қазірдің өзінде бірқатар салада жұмыс істейді және жан-жақты көмек көрсетуде өзінің тиімділігін дәлелдеп отыр. Бұл туралы ОКҚ алаңында өткен баспасөз конференциясында ҚР Төтенше жағдайлар вице-министрі Кеген Тұрсынбаев мәлімдеді.
«Шымкент пен Ақтөбеде төтенше жағдайларға жедел ден қою үшін әуе отрядтары құрылды. Болашақта мұндай бөлімшелер барлық аймақта пайда болады. Бұл көмек уақытылы көрсетіліп қана қоймай, барлық жерде болу үшін жасалған қадам. Біз үшін елдің әрбір азаматы өзін қауіпсіз сезінгені маңызды. Сондықтан ауылдық округтерде «Ауыл құтқарушылары» ведомстволық бағдарламасы жүзеге асырылуда. Осылайша, шағын ауылдардың мыңдаған тұрғынын қорғайтын 82 жаңа өрт сөндіру пункті ашылды. Еріктілерге техникалық қолдау көрсетіледі және байланыс құралдары беріледі», – деп атап өтті вице-министр.
Спикер азаматтық қорғаныстың әскери бөлімдері ТЖ жоюдың негізгі резерві болып табылатынын атап өтті. Ұтқырлық пен жеделдікті арттыру үшін Алматы, Орал, Өскемен және Қостанайда құтқару батальондары құрылды. Табиғи қауіптерді, оның ішінде көшкін және сел процестерін мониторингтеу жүйесін дамытуға ерекше назар аударылады.
«Алатау тауларында заманауи гидро-және сейсмикалық бекеттер орнатылған. Сонымен қатар сейсмологияның ғылыми базасы жетілдірілуде, жабдықтар жаңғыртылуда, Қазақстан-Қытай Сейсмология орталығын құру туралы меморандумға қол қойылды. Алматыда жер сілкінісі кезінде зардап шеккендерді қабылдау және орналастыру және құтқару операцияларын үйлестіру үшін «Алатау» Оңтүстік базасы құрылды», — деді Кеген Тұрсынбаев.
Вице-министр реформа аясында аумақтық бөлімшелер мен ведомстволық бағынысты мекемелерді шоғырландыру жүргізілгенін айтты. Өңірлерде басқарудың бірыңғай қағидаты қабылданды. Бұл ресурстарды орталықтандыруға және жергілікті үйлестіруді жеңілдетуге мүмкіндік берді. Спикердің айтуынша, бұл шаралардың барлығы азаматтық қорғау саласындағы ұтқырлықты, жедел әрекет етуді арттыруға және басқарушылық вертикалды күшейтуге бағытталған.