Түркістан облысы Түлкібас ауданында халықты сапалы әрі үздіксіз ауыз сумен қамту мақсатында ауқымды жұмыстар жалғасын табуда. Мәселен жыл басынан бері аудан аумағындағы 2 елді мекеннің (Жабағылы және Машат) әбден тозығы жеткен су жүйесі толық құрылымдаудан өтсе, 28 ауылдың су жүйесіне ағымдағы жөндеу жұмыстары жүргізіліп жатыр. Бұл туралы Түркістан облысы әкімінің баспасөз қызметі хабарлады.
Бүгінгі таңда 14 елді мекенде, яғни, Майтөбе, Ақбиік, Құлан, Керейіт, М.Жәрімбетов, Қабанбай, Күмісбастау, Келтемашат Қараағашты, Шұқырбұлақ, Жанұзақ, Азаттық ауылдарында ағымдағы жөндеу жұмыстары толығымен аяқталған.
Қазіргі уақытта Жыланды, Жиынбай, Күмісбастау, Састөбе, Қызылбастау, Көктерек, Еңбекші, Амангелді, Пістелі, Көкбұлақ, Даубаба, Тастұмсық, Разьезд -114, Жаскешу елді мекендерінде ағымдағы жөндеу жұмыстары жүргізіліп жатыр. Аталған жұмыстарды жылдың соңына дейін аяқтау жоспарланған.
Аудан әкімі Асқар Естібаев және аудандық мәслихаттың төрағасы Серғали Сәрсенбаев су жүйесіндегі кемшіліктерді реттеу мақсатында құрылыс жұмыстары іске асып жатқан Азаттық, Тастұмсық, Жыланды, Пістелі және Көкбұлақ ауылдарында болып, ондағы атқарылып жатқан жұмыстар барысын бақылады.
Аралау барысында аудан басшысы жауапты мамандармен Азаттық елді мекеніндегі биікте орналасқан, яғни су қысымы жетпей жатқан көшелерге қысымды көтеріп, су жеткізу мәселесін пысықтап, нақты шешімдер қабылданды. Ал Тастұмсық, Жыланды және Көкбұлақ ауылдарындағы ұңғыманы тазалау, су жинайтын мұнара аймағын қоршап, талапқа сай ету жұмыстарын сапалы әрі жылдам аяқтау тапсырылды.