Ордабасы ауданы аумағындағы Бөген суқоймасы маңынан қола дәуіріне тиесілі аса құнды археологиялық жәдігерлер табылды. Белгілі археолог А.Подушкин жетекшілік еткен ғылыми экспедиция барысында жүргізілген қазба жұмыстары нәтижесінде б.з.д. 60–40 мыңжылдық кезеңіне жататын тас құралдар, алтынмен көмкерілген әйел әшекейлері, қоладан жасалған білезіктер мен тұрмыстық бұйымдар, жауынгердің қару-жарақтары, ортағасырлық мыс тиындар табылды. Бұл туралы Түркістан облысының Өңірлік коммуникациялар қызметі хабарлады.
Мамандардың айтуынша, бұл – Орталық Азия тарихы үшін теңдесі жоқ жаңалық, себебі мұндай жәдігерлер Түркістан облысы аумағынан алғаш рет табылып отыр.
Барлық табылған бұйымдар ғылыми тұрғыда зерттеліп, «Ордабасы» ұлттық тарихи-мәдени қорық-музейінің қорына өткізілетін болады. Тарихи орында болған Ордабасы ауданы әкімінің орынбасары Илияс Тұрнияз “Бұл – халқымыздың бай тарихының айқын дәлелі. Археологиялық зерттеу жұмыстарына аудан әкімдігі тарапынан қолдау көрсетіліп, алдағы уақытта да жалғасын табатын болады”, – деп атап өтті.