Жасөспірімдерге қатысты зорлық-зомбылықтың алдын алу және оның себептерін анықтау мақсатында Түркістан облысы полиция департаментінің Қоғамдық қауіпсіздік басқармасы бірқатар түсіндіру іс-шараларын ұйымдастырды. Бұл туралы Түркістан облысы полиция департаментінің баспасөз қызметі хабарлады.
Аталмыш іс-шарада полиция подполковнигі Мұхтар Туғанбаев, полиция майоры Гүлбану Ділдәбекова және полиция лейтенанты Мөлдір Құрманбекова №13 көпсалалы колледжде студенттермен кездесу өткізіп, 300-ге жуық жасқа құқықтық түсіндіру жұмыстарын жүргізді.
Кездесу барысында қатысушыларға зорлық-зомбылықтың түрлері, оның құқықтық және психологиялық салдары, сондай-ақ оны болдырмау жолдары түсіндірілді. Сол күні аудандық мәдениет үйінде билер кеңесі, ауданның бас имамы және әжелер алқасының төрайымдары қатысқан дөңгелек үстел өтті. Жиында отбасы мен қоғамдағы зорлық-зомбылықтың алдын алу тетіктері талқыланып, бірлескен ұсыныстар қабылданды.
Ал 29 қазан күні №2 Ө.Жәнібеков атындағы мектепте ауданның 150-ге жуық мектеп директорлары мен әлеуметтік педагогтары қатысқан кеңейтілген жиын өтті. Онда балалардың қауіпсіздігін қамтамасыз ету, сенім телефондарының тиімді жұмысын ұйымдастыру және мектептерде қауіпсіз орта қалыптастыру мәселелері қаралды.