2025 жылғы маусым айының 24-і күні ҚР Кәсіподақтар федерациясының бастамасымен бастау алған «БІЗГЕ ҚАНДАЙ КӘСІПОДАҚ КЕРЕК?» атты акция аясында Түркістан облысы білім басқармасының Сайрам ауданының білім бөлімінің «Оқу-өндірістік комбинаты» коммуналдық мемлекеттік мекемесінің бастауыш кәсіподақ ұйымында маңызды кездесу ұйымдастырылды. Бұл шараның мақсаты — кәсіподақ мүшелерінің пікірін тыңдау, олардың ұсыныс-тілектерін ескере отырып, кәсіподақ қызметін жетілдіру және еңбек адамдарының құқықтарын қорғаудағы рөлін күшейту. Бұл туралы Түркістан облысы кәсіподақтар орталығы хабарлады.
Кездесуге «Түркістан облысы кәсіподақтар орталығы» аумақтық кәсіподақтар бірлестігінің төрағасы Бердіғали Өмірәлі, төраға орынбасары Айдар Бахтыбаев, мекеме директоры Сакен Султанов пен кәсіподақ мүшелері қатысты. Ашық диалог форматында өткен жиын барысында қатысушылар кәсіподақтың қазіргі жағдайын талқылап, оның болашағы туралы ой қозғады.
Негізгі тақырыптар:
- Кәсіподақтың қызметінің ашықтығы мен тиімділігін арттыру;
- Жұмысшылардың әлеуметтік кепілдіктерін қорғау;
- Еңбек қауіпсіздігі мен жағдайын жақсарту;
- Жастарды кәсіподақ қозғалысына тарту;
- Кәсіподақ мүшелерінің құқықтық сауаттылығын арттыру.
Кездесу барысында кәсіподақ мүшелері өздерінің нақты проблемаларын айтып, жұмыс берушілермен қарым-қатынаста туындайтын мәселелерді ортаға салды. Бірқатар ұсыныстар мен бастамалар айтылып, оларды алдағы кәсіподақ жұмысына енгізу мәселесі қарастырылды.
Шара соңында қатысушылар кәсіподақтың басты міндеті – еңбек адамының құқығы мен мүддесін қорғау екенін тағы да бір мәрте атап өтті. Сондай-ақ, бұл акция аясындағы кездесулер алдағы уақытта басқа да өңірлерде жалғасатыны мәлім болды.
Қорытындылай келе, «БІЗГЕ ҚАНДАЙ КӘСІПОДАҚ КЕРЕК?» акциясы – кәсіподақтың қоғамдағы рөлін қайта қарауға, оны заманауи талаптарға сай бейімдеуге бағытталған маңызды қадам. Мұндай ашық пікір алмасулар еңбек ұжымдарының бірлігін нығайтып, әділдік пен әлеуметтік әділеттілікті қамтамасыз етуге зор үлес қосары сөзсіз.