Түркістан қаласында «Бүгінгі көшбасшы – кешегі тұлғадан үлгі алады» атты еркін форматта жастармен кездесу өтті. Басқосуға қала әкімі Әзімбек Пазылбекұлы, қалалық мәслихаттың төрағасы Ғаппар Амантайұлы арнайы қатысып, жастармен тілдесті. Сондай-ақ, шараға жас мамандар мен депутаттар, сарбаздар, құқық қорғау және төтенше жағдайлар қызметкерлері, студенттер мен белсенді жастар қатысты. Кездесу барысында қала әкімі жастардың көкейінде жүрген сұрақтарына жауап беріп, өзінің еңбек жолынан түйген тәжірибесімен бөлісті. Бұл туралы Түркістан облысының Өңірлік коммуникациялар қызметі хабарлады.
Кездесу өңірден шыққан көрнекті тұлғалардың өмір жолын үлгі ету, жастарды отансүйгіштікке, көшбасшылыққа және белсенді азаматтық ұстанымға баулу, жастармен тығыз байланыс орнатуға бағытталған. Басқосуға белсенді жастардың бірі Айбар Мырзагелді қазіргі заман жастарының алдында тұрған маңызды мәселелерге тоқталып, оларды шешу бойынша нақты ұсыныстарын айтты. Ол Түркістанда жастар үшін жасалған заманауи инфрақұрылымдардың тиімді пайдаланылмай отырғанын атап өтіп, жастарды білім алу мен еңбекқорлыққа ұмтылуға шақырды. Сонымен қатар, әкімдік тарапынан қатысушы жастардың бастамалары қолдау тауып, қала басшысы жастар кеңесін құру — үлкен қадам болатынын атап өтті.