Түркістан қаласында 4 жаңа әлеуметтік дүкен ашылды. Осымен қаладағы әлеуметтік дүкендер саны 30-ға жетіп отыр. Ғимараттар жеке кәсіпкерлердің қаражаты есебінен салынып, игі бастама «Түркістан» әлеуметтік-кәсіпкерлік корпорациясы» АҚ-мен бірлесе жүзеге асырылуда. Жұмысын бастаған әлеуметтік дүкендерге тұрақтандыру қорының өнімдері жеткізіліп, белгіленген бағада халыққа ұсынылуда. Бұл туралы Түркістан облысының Өңірлік коммуникациялар қызметі хабарлады.
– Жалпы Түркістан облысында 39 әлеуметтік дүкен бар. Оның 7-еуі Кентау қаласында болса, 2-еуі Арыс қаласында, 30-ы Түркістанда орналасқан. Әрбір әлеуметтік дүкен көлемі – 50 шаршы метр. Бұдан бөлек, ірі сауда үйлерінде және 25 сауда орнында әлеуметтік бұрыштар қарастырылған. Онда күнделікті тұтынатын 19 түрлі тауар арнайы қолжетімді бағада сатылуда. Яғни, базар бағасынан 40-50%-ға дейін төмен бағада ұсынылуда. Азық-түлік бағаларын тұрақтандыру және әлеуметтік дүкендер санын арттыру бойынша жұмыстар жалғасады, – дейді «Түркістан» ӘКК» АҚ Тұрақтандыру қоры департаментінің директоры Лаура Жанасбаева.
Қазіргі таңда әлеуметтік дүкендердегі 19 түрлі тауарлардан нан бөлкесі – 70 теңге, ас тұзы – 45 теңге, тауық жұмыртқасы – 40 теңге, қырыққабат – 65 теңге, пияз – 85 теңге, сәбіз – 110 теңге, картоп – 130 теңге, қарақұмық жармасы – 180 теңге, 1 сұрыпты бидай ұны – 190 теңге, тазартылған күріш – 350 теңге, қант-шекер – 390 теңге, пастерленген сүт – 370 теңге, айран – 370 теңге, күнбағыс майы – 550/585 теңге, тауық еті – 970 теңге, сүзбе– 1300 теңге, сиыр еті – 2000 теңге, сары май келісі– 2300 теңге.