Премьер-министрдің орынбасары – ұлттық экономика министрі Серік Жұманғариннің төрағалығымен өткен жиында азық-түлік қауіпсіздігін қамтамасыз етудің ағымдағы жағдайы қаралды, деп хабарлайды Primeminister.kz.
Азық-түлік қауіпсіздігі екі негізгі элементке негізделеді: азық-түліктің нақты қолжетімділігі – Ауыл шаруашылығы министрлігі, ал экономикалық қолжетімділігі – Сауда және интеграция министрлігі жауап береді.
Азық-түлікпен қамтамасыз ету бойынша нақты іс-шаралар АӨК-ті дамытудың 2030 жылға дейінгі тұжырымдамасы мен 2028 жылға қарай ауыл шаруашылығының жалпы өнімінің көлемін екі есеге арттыру жөніндегі Жол картасында бекітілген.
Ауыл шаруашылығы министрлігінің деректері бойынша, 2021–2024 жылдары жалпы өнім көлемі 11,3%-ға көтеріліп, 7,5 трлн. теңгеден 8,3 трлн. теңгеге дейін өсті. Оның ішінде өсімдік шаруашылығы 14%-ға (4,4-тен 5 трлн. теңгеге дейін), мал шаруашылығы 5,6%-ға (3,1-ден 3,29 трлн. теңгеге дейін) артты. 2025 жылдың бірінші жартыжылдығында өсім 3,7%-ды құрап, 1,8 трлн. теңгеге жетті.
Биыл егіс алаңы 23,6 млн гектарға дейін ұлғайтылды (+322,8 мың га). Бұл ретте дәнді және дәнді-бұршақты дақылдар алқабы қысқарып (- 629,9 мың га), әлеуметтік маңызы бар әрі жоғары рентабельді дақылдардың алқабы кеңейді: майлы дақылдар – 4 млн га (+1 055,5 мың га), картоп – 131,2 мың га (+9,3 мың га).
Мал шаруашылығында 2025 жылдың бірінші жартыжылдығында барлық мал түрлерінің басы өскен: ІҚМ – 8,3%-ға (8,8 млн бас), қой мен ешкі – 0,8%-ға (21,5 млн бас), жылқы – 4,7%-ға (4,6 млн бас), құс – 2,7%-ға (47,7 млн бас). Бұл өнім өндірудің артуына ықпал етті: ет (тірідей салмақта) – 529,9 мың тонна (+1,5%), құс еті – 187,7 мың тонна (+4,9%), сүт – 1,8 млн тонна (+7%), тауық жұмыртқасы – 2,2 млрд. дана (+0,9%).