Мәдениет – ең алдымен жәдігерлік. Оны ұрпақтан ұрпаққа жеткізуші – зиялы қауым. Сауран ауданы, Шорнақ ауылдық округінің мәдениет үйінде 21 мамыр – Мәдениет және өнер қызметкерлерінің күніне орай «Мәдениет – руханияттың ұлы өрісі» атты мерекелік шара өтті. Бұл туралы «AMANAT» партиясы Сауран аудандық филиалының баспасөз қызметі хабарлады.
Іс-шараға «AMANAT» партиясы Сауран аудандық филиалының төрағасы Асылбеков Сағынбек Жақсыбекұлы, аудандық мәслихат депутаттары Боханов Сұлтанбай Серікбайұлы, Шарапов Хуршид Бахтиярұлы, кітапханашылар, музей қызметкерлері, мәдени ұйымдастырушылар қатысты. Шараны «AMANAT» партиясы Сауран аудандық филиалының төрағасы Асылбеков Сағынбек Жақсыбекұлы ашып, мәдениет қызметкерлерін төл мерекелерімен құттықтады. Сондай-ақ, ауданымызда мәдениет саласына еңбегі сіңіп келе жатқан әжелер тобын, мәдениет қызметкерлерін «AMANAT» партиясы Түркістан облыстық филиалының төрағасы Үмбеталиев Алтынсары Дүйсенбекұлының алғыс хатымен марапаттап, сый-құрмет көрсетті.
Бұл мереке туған жеріміздің мәдени құндылықтарымызды насихаттауға, рухани дамуына зор үлес қосып жүрген жандарды біріктірген, шығармашылық адамдарына деген айрықша құрметтің белгісі, әрбір мәдениет қызметкері үшін ерекше күн.
«AMANAT» партиясы Сауран аудандық филиалының төрағасы Асылбеков Сағынбек Жақсыбекұлы:
– Ғасырлар бойы мәдениет, өнер, ғылым, руханият пен өркениеттің ордасы болған қазақ халқы бай мәдени мұраға ие. Бүгін осында отырған мәдениет пен өнер өкілдері – сіздер сол теңдессіз мұраны сақтап, оны келер ұрпаққа жеткізушісіздер. Еліміздің осындай бай өркениетке ие болуының басты себебі – кішкентайынан бастап, өнерпазынан басшысына дейін әркімнің өнерге деген құрметі мен адалдығы. Бұл – қазақ халқының ең маңызды қасиеттерінің бірі және оның мәдениет пен өнерге деген шынайы ықыласының көрінісі, – деп мәдениет қызметкерлеріне өз алғысын жеткізді.
Іс-шара соңы концерттік бағдарламаға ұласып, мәдениет қызметкерлері әннен шашу шашып, көрерменге көтеріңкі көңіл-күй сыйлады.