Әуесқой бокстан сән қашқалы қашан?! Қызығы да қалмай барады. Басты себеп – қазақ боксшыларының нәтижелері төмендеп кеткендігі емес, әділетсіз төрелік. Бұрын да оңып тұрмаған-ды. Қандай жарыс болсын, төрешілер қазақты аяқтан шалуға тырысып бағатын. Геннадий Головкин IBA-дан кетіп, World Boxing-ке өтетінімізді жария еткелі жағдайымыз тіпті нашарлап кетті. Жерлестерімізді жарыс жолынан ерте шығарып тастайтын түрлі тәсілдер қолданатын болды. Оған дәлелді алыстан іздеудің де қажеті жоқ.
Күні кеше ғана Тайландта бокстан Азия чемпионаты өтті. Төрешілер біраз әділетсіздік жасап, қыздарымыздың көз жасына қалды. Ол өз алдына бөлек тақырып…
Жігіттерді де аяған жоқ. Жарыс барысында өткен кемшіліктерді тізбектемей-ақ ақтық сындағы жекпе-жектердегі бұра тартушылықтарды айтсақ та жетіп артылады.
Мысалы, финалда шаршы алаңға бірінші болып шыққан Санжар Тәшкенбайдың жекпе-жегіне тоқталайық. Жарайды кездесу тең дәрежеде өтті делік. Қарсыластың басы қабаққа кездейсоқ тиіп кетті деп есептейік. Жанға бататын ауыр соққы тимесе де біздің жігітке нокдаун ашып, есеңгіреді деп есептеді. Өзбек боксшысын сенімдірек жеңіске жетті деп көрсету үшін жасалған әрекет екені анық байқалып қалды.
«Өзбек боксшылары лас бокстасады» дегенді бұрыннан айтатынбыз. Жұдырықтасу шеберлігі жетпей жатқан тұста сасық қулық жасайтындары бар. Бәрі демейміз, бірақ баршылық. Басқа елдің боксшыларымен жан алысып, жан беріскен айқаста сау шығатын жігіттеріміздің оңтүстіктегі көршімізбен кездескенде жиі қабағы жарылады. Кездейсоқтық па? Баспен ұрып жіберу, иықпен қағып қалу… тістеп алу… Иә, бас пен иықтың көмегі жеткіліксіз боп жатқан тұста тісті де іске қосатынды шығарыпты.
Бұл жағдай Абылайхан Жүсіпов пен Хавасбек Асадуллаев арасындағы жекпе-жекте орын алған. «Әлің жетпей жатса тістеп алсай» дегенді естуші едік бала күнімізде. Өзбек боксшысы сол сөзді құлағына мықтап құйып алғандай. Тек жұдырықтаса берсе қарсыласына есе жіберіп қоятынын сезсе керек, тіске ерік берген. Абылайхан Жүсіповтің иығына жақсылап із салып беріпті. Бұны аттам жерде тұрған төрешінің көрмеуі мүмкін емес, әрине. Бірақ байқамағансып, бәсекені тоқтатпаған.
Әй, қазақтың жігіттері-ай. Қулық жасауды да білмейсіңдер-ау. «Желке тұсымнан түйіп қалды», «Кіндіктен төмен ұрып жіберді» деп шағымдануды жақсы көретін боксшының бірі болса жата қалып ойбайлар еді-ау. Абылайхан да ер екен. Ауырсынғанын да байқатпай жұдырықтасуды жалғастыра берген. Әрине, өзбек боксшысы бұл әрекетке арандатушы үшін барғаны анық. Сол сәтте спортқа жат қылықтың ұшын көрсетсе, біздің жігітті жарыстан шеттетіп те тастар ме еді. Жоқ, арам ой іске аспады. Нәтижесінде «Сабыр түбі сары алтын» дегеннің нақ өзі болды да шықты. Тайландта өзбек боксшысы жеңімпаз деп танылғанымен, Абылайхан елімізге жеткенге дейін алтыннан алқа тағынып, чемпион болып оралды. Ал спорттық ережені бұзған өзбек боксшысы жүлдеден қағылып, белгілі мерзімге бокстан шеттетілді.
Өкінішке қарай, бұл Қазақстан тарапында ереже бұзылуына дәлел ретінде фото және видео материалдар болғаны үшін орнаған әділ шешім. Басқа жағдайда төрешілердің шешімін өзгерту мүмкін емес шаруа.
Мұрат СЕРІКБАЙҰЛЫ