Ата – бәйтерек, бала – жапырақ… Осы бір тағылымды сөз бүгінгі кештің өзегіне айналды. «AMANAT» партиясы Созақ аудандық филиалының «Мыңжылқы» бастауыш партия ұйымының төрайымы Э.Бейсехулова мен аудандық орталық кітапхананың бірлесе ұйымдастыруымен ерекше мағыналы «Әке сөзі – дана сөзі» атты әдеби-танымдық кеш өтті. Бұл туралы «AMANAT» партиясының Созақ аудандық филиалы хабарлады.
Кешке оқушылар, студенттер, мәдениет үйі қызметкерлері және түрлі сала мамандары қатысты.
Кештің негізгі мақсаты – отбасының тірегі, балаға бағыт берер шамшырақ – әкенің қоғамдағы, отбасындағы рөлін ұлықтау, әке мен бала арасындағы рухани байланысты нығайту, жастарға өнеге көрсету.
Кеш барысында «AMANAT» партиясы Созақ аудандық филиалының «Мыңжылқы» бастауыш партия ұйымының төрайымы Эльмира Бейсехулова қатысушыларды құттықтап, ізгі тілегін білдірді.
Ол өз сөзінде: «Әке – тек отбасының ғана емес, ұлттың ұстыны. Әкенің сөзі – ұрпаққа аманат, ісі – өнеге. Бүгінгі кеш – сол аманатты дәріптеуге арналған. Барша әкелерге зор денсаулық, отбасыларыңызға амандық тілеймін!» – деп атап өтті.
Кітапханашы Ақниет Сырлыбайқызы арнайы дайындалған «Әке сөзі – дана сөзі» атты кітап көрмесімен таныстырып, көрмеде ұсынылған әдеби шығармалар мен әке тақырыбына арналған материалдар жөнінде мазмұнды мәлімет берді.
Библиограф Еркебұлан Дайрабай М.Мақатаевтың жүрек тебірентерлік «Әке» атты өлеңін нақышына келтіре оқып, көрермендерге ерекше әсер сыйлады.
Танымдық викторина бөлімінде қатысушылар мақал-мәтелдер мен ұлттық таным негізінде әзірленген сұрақтарға жауап берді.
Әке – асқар тау.
Әкелерге арналған бұл кеш – тек құрмет пен алғыс білдіру емес, сонымен қатар ұрпақтар арасындағы сабақтастықты, ата жолын ардақтауды ұлықтайтын тағылымды шара болды.