Түлкібас ауданының табиғи көркіне айналған Балықты көлі аумағында абаттандыру және инфрақұрылымды дамыту жұмыстары қолға алынуда. Осы мақсатта аудан басшысы Асқар Естібаев бастаған жұмысшы топ жоба бойынша ұсынылған жоспарды зерделеді. Бұл туралы Түркістан облысының Өңірлік коммуникациялар қызметі хабарлады.
Жобаға сәйкес, шомылу маусымында келушілердің қауіпсіздігін қамтамасыз ету үшін екі бақылау мұнарасы, шомылу аймағының шектеулі аймағы, балаларға арналған кішігірім бассейн және абаттандыру жұмыстарын жүргізу көзделуде. Сонымен қатар, демалушыларға жайлы жағдай жасау мақсатында кемі 5 глемпинг, 5 вагон, тапшандар және шағын демалыс шатырлары орнатылады.
Аудан басшысы Балықты көлі аумағының ерекше табиғи сұлулығына тоқталып, бұл жердің болашақта ауданның мақтанышына айналатын экотуристік демалыс орны болуына барлық мүмкіндік бар екенін атап өтті. Сондай-ақ, аталған аумаққа экопост қойылуы туралы да сөз етті. Ұсынылған эскиздік жобаны облыстық салалық басқармамен келісуді тапсырды. Оң баға берілген жағдайда өңірге туристерді тарту және инфрақұрылымды дамыту бағытында жұмыстар жүретін болады.