«ШЫМКЕНТ – ШЫРАЙЛЫ ШАҺАРЫМ!»

Өзбекстан астанасы Ташкентте Қазақстанның Өзбекстандағы жылы аясында «Шымкент – шырайлы шаһарым!» атты мәдениет күндері өтуде. Бұл туралы Шымкент қаласы әкімдігінің ресми сайты хабарлады.

Шымкент қаласы әкімінің бірінші орынбасары Қайрат Нұртай бастап барған делегация құрамында қалалық ішкі саясат және дін істері басқармасының басшысы Жанар Бектаева, Әселхан Қалыбекова, Аманхан Әлім, Қасымхан Бегман, Бекжан Әшірбаев, Көпен Әмірбек сынды қаламгерлер, Шахизада, Заттыбек Көпбосынұлы, Ақжол Мейірбеков секілді өнерпаздар мен Маржан Есжанова, Калима Оралова, Ақмарал Леубаева сияқты айтыскер ақындар, БАҚ өкілдері бар.

Салтанатты жиынды өнер қайраткері Қалдыбек Құрманәлі жүргізіп отырды. Шымкент қаласы әкімінің бірінші орынбасары Қайрат Нұртай жиынның ашылуында құттықтау сөз сөйлеп, осынау іс-шараның екі мемлекет халқын жақындастыру тұрғысынан алғанда аса маңызды екеніне тоқталды.

Қайрат Ырзақұлұлы өз сөзінде бауырлас екі елді ортақ тарихи тағдыр, туыстас тіліміз, дініміз бен мәдени құндылықтарымыз біріктіретінін атап өтті, сонымен қатар жиналған қауымға Шымкент қаласының әкімі Ерлан Айтаханов мырзаның жылы лебізін жеткізді.

Іс-шара аясында елімізге танымал ақындар мен жазушылар, өнер қайраткерлері Ташкент кітапханасында ұйымдастырылған мерекелік жиынға қатысып, екі елдің достығы дәріптелді. Онда қатысушылар тәуелсіз Қазақ елінің өткені мен бүгінін айғақтайтын кітап көрмесін аралап көрді.

MIXNEWS.KZ

Пікір жазу

Э-пошта мекенжайыңыз жарияланбайды. Міндетті өрістер * таңбаланған