ӘР КАНДИДАТ ТҰРҒЫНДАРДЫҢ ҚАЛАЙ ӨМІР СҮРІП ЖАТҚАНЫНАН ХАБАРДАР БОЛУЫ ШАРТ

Шымкентте Жастар мәслихаты құрылады. Шымкент қаласы Қоғамдық кеңесінің отырысында қалалық мәслихаттың хатшысы Ғани Ташқараев осындай ұсыныс білдірген. Бұл туралы Шымкент қаласы әкімдігінің ресми сайты хабарлады.

Кеңес отырысына қатысқан қала әкімі Ғ.Әбдірахымов Шымкенттің әрбір төртінші тұрғыны жастар екенін айтып, жастар мәслихатының құрылуы уақыт талабы екенін жеткізді.

Жиында қалалық отбасы, балалар және жастар істері жөніндегі басқарма басшысы Ж.Қалтаев жастар мәслихатына сайлауға түсетін үміткерлердің кімдер бола алатынын атап өтті. Оның айтуынша, жастар мәслихатына Шымкент қаласының аумағында тұратын 14-29 жас аралығындағы Қазақстан Республикасының азаматтары мүше бола алады. Жалпы мәслихат 29 жас депутаттан құралып, өкілеттілігі екі жылға созылады.

– Сайлауға қатысушы әр кандидат қоғаммен етене қарым-қатынас жасап, тұрғындардың қалай өмір сүріп жатқанынан хабардар болуы шарт. Жастар мәселесінде шешілмей жатқан түйіндерді анықтап, оларды шешу жолдарымен ұсынатын сайлауалды бағдарламалары да болуы қажет. Себебі олар билік басында қала жастарына тұрғын үй беру, жұмыссыздық деңгейін төмендету жалпы жастарды әлеуметтендіру мәселелеріне қатысты күрделі шешім қабылдайтын болады, – деді басқарма басшысы.

Жастарды қолдау – бұл еліміздің болашағына салынған инвестиция екенін алға тартқан қала әкімі сайлау ашық әрі әділ болуы үшін онлайн режимде өткізуді ұсынды.

MIXNEWS.KZ

Пікір жазу

Э-пошта мекенжайыңыз жарияланбайды. Міндетті өрістер * таңбаланған