Cирек кездесетiн және жойылып кету қаупi төнген жабайы аңдар мен ақбөкендерді қорғау кезінде екі инспекторы мен браконьерлер арасында болған қақтығыстан қайтыс болған Ерлан Нұрғалиев жайлы ақпарат тарады. Еске сала кетейік, оқиға 2019 жылдың 13 қаңтарында Қарағанды облысының Нұра ауданында орын алған. Осы оқиға жайлы әлеуметтік желілерде де жарыса жазылып жатқаны белгілі. Осы орайда орамды ой айта білген журналист, медиалектор, блогер Өркен Кенжебектің әлеуметтік желідегі парақшасына жариялаған жазбасын назарларыңызға ұсынып отырмыз.
«2 жыл бұрын Чернобыль атом электр стансасында болғанмын. Болғанда қалай? Тірі жан рұқсатсыз кірмейтін территорияда екі күн жүріп, жарылған төртінші реакторға 400 метрге дейін жақындап, 900 микрозиверт радиация жинап қайтқанбыз. Сонда бізді алып жүрген гид қанымыз қатып қалатындай небір сұмдықты айтты дейсің.. Бірақ, мына әңгімесі есімнен еш шықпайды. Чернобылда авария болған сәтте үлкен басшылары қашып кетеді. Төмендегі жұмысшылар телефон соққанда «Өздерің бірдеңе қылыңдаршы» деп жауапкершіліктен тайқиды. Содан лауазымы бойынша ең төмен адамдар қалады да, өздері тәуекелге бел буады. Радиация бұдан да көпке тарамас үшін қауіпсіздік нұсқауларына қарамай, осы сөздің тіке мағынасында өлімге қияды. Қараңғыда улы суды белден кешіп жүріп, бір трубаны бір трубадан ажыратады, өртті сөндіреді. Солардың көбісі тым көп сәулеленуден қайтыс болды. Солардың көбісі өте қарапайым жұмысшылар еді деген еді гид…
Қарағанды облысында киікті қорғаймын деп қаза тапқан Ерлан Нұрғалиев туралы естігенде, осы эпизод есіме түсіп кетті. Бұл ағамыз кезінде ауылда участковый болып жұмыс істепті. Тәртіпке қатал болыпты марқұм. 13 қаңтарда Ерлан Нұрғалиев пен Пётр Ницык киіктерді жөн-жосықсыз атып жатқан браконьерлердің ізіне түсіп береді. Бақайшағына дейін қаруланған жауыз пәлелер атысады кәдімгідей. Сөйтіп, Ерлан Нұрғалиев браконьерлердің қолынан қаза табады. Денис Тен қайтыс болғанда, қабырғамыз сынардай қайғырып едік. Неге? Еліміздің атын әлемге шығарар жұлдыз сөнді деп жылағанбыз. Ал Ерлан Нұрғалиевті қайтыс болған соң танып жатырмыз. Себебі, «кішкентай адам». Былтыр Қорғалжын қорығына журналистер барғанда, фотоға осылай түсіріп алғанына да рахмет.. Бірақ, мемлекеттің ішкі тұрақтылығы осындай адамдардың еңбегінен тұнады. Тұрады. Қалай атасаңыздар да, өз еркіңіз.
Бұларды атып кеткен және атып кетуі мүмкін адамдар ертең-ақ шартты жазасын алып, қайтадан киік пен адам атып жүре беруі мүмкін. Ал бұлар мардымсыз айлыққа күндіз-түні қу жанын шүберекке түйіп, желдің өтінде, жердің сызында киік қарауылдап жүргені. Медаль да алмайды, марапат та бұйырмайды. Осындай жанқиярлықтың арқасында шығар, біздегі киік басының 215 мыңға жеткені… Марқұмның жаны жәннаттан болсын!» деп жазды Өркен Кенжебек өз парақшасында.
Болған оқиға жөнінде журналистердің сұрағына жауап берген ҚР ІІМ Қ.Қасымов «уақыт жоғалтып» алғандықтарын айта келе, ТЖ тікұшағын қолайсыз ауа-райының кесірінен дер кезінде жарақаттанған Ерлан Нұрғалиевті ауруханаға жеткізуге жібере алмағанын алға тартқан. Бұл жөнінде https://tengrinews.kz/ хабарлады.
Қылмыстық іс қозғалған, алдын ала тергеу ісі «Кісі өлтіру» деген баппен жүргізілуде.
Фото: Ө.Кенжебектің әлеуметтік парақшасынан
