Түркістанға ұзындығы 12 метр, ал сыйымдылығы 82 жолаушы болатын екі деңгейлі туристік электрлік автобус жеткізілетін болды. Бұл туралы Түркістан облысы әкімінің баспасөз қызметі хабарлады.
Бүгін Түркістан облысы әкімі Өмірзақ Шөкеев пен қытайлық «BYD» компаниясының өкілдері арасында Түркістан қаласында шоғырланған тарихи-мәдени орталықтарға туристерді тасымалдау үшін экологиялық таза көлік ендіру мәселесі бойынша кездесу өтті.
Жиын барысында облыс әкімі өңірге келетін туристер мен зиярат жасайтын адамдар санының жыл сайын артуын тілге тиек етіп, оларға жасалатын қолайлы жағдайдың да жақсаруы қажеттілігін айтты. Мысалға, 2018 жылы Түркістан облысына 1,5 млн турист келсе, биыл бұл көрсеткіш 1,7 млн адамға жетеді деп күтілуде.
Кездесу нәтижесінде өңірге ұзындығы 12 метр, 82 жолаушыға арналған екі деңгейлі туристік электрлік автобус жеткізілетін болды. Айта кетерлік жайт, бұл автобустар «BYD» батареялары көмегімен жұмыс істейді және қуаты 200 шақырымға жетеді. Бұл Түркістанның экологиялық жағдайы тұрғысынан алғанда таза қалаға айналуына өз үлесін қосады деп күтілуде. «BYD» өкілдері автобустарды биылғы жылдың соңына дейін толық тасымалдайтынын баяндады.
Сондай-ақ, қос тарап арасында Түркістан облысы аумағында электрлік батареялар, күн панельдері, және де электрлік автокөліктер мен электрлік автобустар құрастыру бойынша өндіріс ашу жөнінде келіссөздер жүргізілді. «BYD» сарапшылары бұл жобаға қызығушылық танытып, нарық әлеуетін зерттейтін болды. Өз кезегінде, облыс басшысы қытайлық тарапқа өндіріске қолайлы жағдайлар жасалған арнайы экономикалық және индустриалды аймақтардың бар екенін айтып, инвесторларға жан-жақты қолдау көрсетілетінін жеткізді.
Қытай делегациясының бұл іссапары ағымдағы жылғы 20-23 мамыр аралығында ҚХР-на Түркістан облысы делегациясын бастап барған облыс басшысының орынбасары Мейіржан Мырзалиев пен «BYD» президенті Ванг Чуанфу мырза арасындағы келісімдердің іс жүзіне асуының жалғасы.
«BYD» – бұл жоғары технологиялық компания және жылына 700 мыңға жуық электрлік көлік шығаратын қуаты бар өз саласының әлемдік көшбасшысы. BYD электроника саласында Samsung смартфондарының шамамен 60 пайызын құрастырады, ал Huawei компаниясы үшін мобильді құрылғылардың 50 пайызын жинайды.
